Бироқ вақт ўтгач, бу тамойиллардан одамларнинг кўпчилиги амалда фойдалана олмаганлигини аниқладик. Уларнинг руҳи тушиб, қўллари ишга бормай қолганди. Биз мотивация (ҳаракатга ундовчи сабаб) алангага ўхшашини, агар ўт олишининг давомийлигини таъминламасанг, у ўчиб қолишини тушуниб етдик.
Мотивация алангасининг давомийлигини таъминлаш учун биз доктор Хилл билан «Success Unlimited» журналини очишга қарор қилдик. Бу журналда мақолалар чоп этиш йўли билан биз янада юқорироқ муваффақиятларга эришишга интилаётганларга куч-ғайрат бағишлаб турдик. Биз улкан натижаларга эришдик: минглаб одамлар журналга улардаги куч-ғайратнинг доимий манбаи сифатида қарайдиган бўлдилар.
Мазкур китобга киритилган мақолалар биринчи бор айнан ана шу «Success Unlimited» журналида босилиб чиққан. Доктор Хилл мақола мавзуларига бўлаётган қизиқишнинг кучайиб бораётганини ҳисобга олиб, улардан энг оммабопларини тўлдирилган ҳолда қайтадан чоп эттирди. Унинг ҳар бир мақоласи «Ўйла ва бойиб кет!» номли бестселлер китоби каби катта қизиқиш билан ўқилади. Чунки мақолаларнинг ҳар бирида китобхонга мурожаат қилинган ва улар миямизнинг чексиз имкониятлари ривожланишини рағбатлантиради.
Маълумки, бу китоб ўз-ўзидан сизга на бахт, на соғлик, на бойлик келтиради. Лекин сиз буларнинг барчасига эришмоқчи бўлсангиз, у янги ғоялар яратишингизга, куч-ғайратингизни мақсадингизга етишиш йўлида сарфлашингизга ёрдам беради. Сиз ўзингиздаги янги — аввал номаълум бўлган имкониятларни кашф этасиз. Энг муҳими, бу китоб сизни ҳаракатга ундайди.